အမျိုးသားသဘာဝဘေးကာကွယ်စောင့်ရှောက်ရေး စီမံခန့်ခွဲမှုလုပ်ငန်းကော်မတီ ဥက္ကဌ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဒေါ်မြတ်မြတ်အုန်းခင်သည် ဒီဇင်ဘာလ (၅) ရက်နေ့၊ နံနက်ပိုင်းတွင် နေပြည်တော် မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန (၂) ၌ ကချင်ပြည်နယ်၊ မြစ်ကြီးနားမြို့နယ်၊ ငွေပျော်စံပြကျေးရွာတွင် သဘာဝဘေးဖြစ်ပွားပါက ခိုလှုံရာအဆောက်အအုံ (Community Shelter) အဖြစ် အသုံးပြုပြီး သဘာဝဘေးမဖြစ်ပွားခင် မူလတန်းကြိုကျောင်းအဖြစ် အသုံးပြုရန်အတွက် ထောက်ပံ့ငွေကျပ် သိန်း (၅၀၀) နှင့် သွပ်အချပ် (၅၀) တို့ကို ကချင်ပြည်နယ် လူမှုရေးဝန်ကြီး ဒေါ်ဘောက်ချာထံ ပေးအပ်ခဲ့ပါကြောင်း သိရှိရပါသည်။