ရခိုင်ပြည်နယ်အတွင်း ၂၀၁၆ခုနှစ်၊ ဇူလိုင်လ(၄)ရက်မှ(၆)ရက်နေ့အတွင်းမိုးသည်းထန်စွာရွာသွန်းမှုနှင့် ဒီရေမြင့်တက်မှုများကြောင့် မြစ်ချောင်းများအတွင်းရေမြင့်တက်လာကာဘူးသီးတောင်မြို့နယ်၊ အမ်းမြို့နယ်၊ ကျောက်တော်မြို့နယ်၊ မြောက်ဦးမြို့နယ်၊ မင်းပြားမြို့နယ်တို့တွင် ရေကြီးနစ်မြုပ်မှုများဖြစ်ပေါ်လျက်ရှိပြီးကူညီကယ်ဆယ်မှုများဆောင်ရွက်လျက်ရှိရာ(၇-၇-၂၀၁၆) နေ့တွင် ထပ်မံသတင်းရရှိမှုများအရ-
အဆိုပါ ရေဘေးသင့်ပြည်သူများအတွက် အမျိုးသားသဘာ၀ဘေးအန္တရာယ်ဆိုင်ရာ စီမံခန့်ခွဲမှုကော်မတီ၏ ဦးဆောင်လမ်းညွှန်မှုဖြင့် ရခိုင်ပြည်နယ်အစိုးရအဖွဲ့၊ လူမှု၀န်ထမ်း၊ ကယ်ဆယ် ရေးနှင့်ပြန်လည်နေရာချထားရေး၀န်ကြီးဌာန၊ သက်ဆိုင်ရာဒေသရှိအုပ်ချုပ်ရေးအဖွဲ့များ၊ တပ်မတော်၊ ရဲတပ်ဖွဲ့၊ ကြက်ခြေနီ၊ လူမှုရေးအဖွဲ့အစည်းများ၊ ရပ်မိရပ်ဖများပူးပေါင်းကာကူညီကယ်ဆယ်ရေးများဆောင်ရွက်ပေးလျက်ရှိကြောင်းနှင့် ဘေးသင့်ဒေသများသို့ ဆန်၊ ခေါက်ဆွဲထုပ်၊ ကြာဆံထုပ်၊ ရေသန့်၊ ကြက်ဥနှင့် Family Kits များ၊ ရေသန့်ဆေးပြားများဆက်လက်ပေးပို့ထောက်ပံ့ပေးလျက်ရှိကြောင်းသတင်းရရှိပါသည်။