===================================================
Source: ကချင်ပြည်နယ်ဦးစီးမှူးရုံး (ဘစမ)
====================================================
ဥရောပသမဂ္ဂ၏ ငွေကြေးထောက်ပံ့မှု အစီအစဉ်ဖြင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ဘေးအန္တရယ်ဆိုင်ရာ စီမံခန့်ခွဲမှု ဦးစီးဌာနနှင့် ကုလသမဂ္ဂဖွံ့ဖြိုးမှုအစီအစဉ် (UNDP) တို့ ပူးပေါင်းပြီး ငလျင်ဘေးအန္တရာယ်ဆိုင်ရာ တုံ့ပြန်နိုင်စွမ်း မြှင့်တင်ရေး စီမံကိန်းကို အကောင်အထည်ဖော် ဆောင်ရွက်လျက်ရှိရာ ကချင်ပြည်နယ်၌ ငလျင်ဘေးအန္တရာယ်ကြောင့် ထိခိုက်ဆုံးရှုံးနိုင်ခြေ လျော့နည်းစေရန်အတွက် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနနှင့် အခြေခံပညာရေးဦးစီးဌာနတို့ပူးပေါင်း၍ ကချင်ပြည်နယ်၊ မြစ်ကြီးနားမြို့၊ အ.ထ.က-၅ ကျောင်းတွင် (၁၃.၈.၂၀၁၈)ရက်နေ့၊ (၀၉း၀၀) နာရီအချိန်မှ (၁၂း၀၀) နာရီအချိန်ထိ ဆရာ/ဆရာမနှင့် ကျောင်းသား/သူ (၅၀၀)ခန့်တို့်ကို ငလျင်ဘေးအန္တရာယ်အသိပညာပေးနှင့် ဇာတ်တိုက်လေ့ကျင့်ခန်းတို့်ကို ပြုလုပ်ခဲ့ပါသည်။
အဆိုပါအခမ်းအနားသို့ ကချင်ပြည်နယ်အစိုးရအဖွဲ့၊ လူမှုရေးဝန်ကြီး ဒေါက်တာ သင်းလွင်မှ တက်ရောက်အဖွင့်အမှာစကားပြောကြား၍ ပြည်နယ်ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနနှင့် ပြည်နယ်ပညာရေးတို့မှ သဘာဝဘေးနှင့်ပတ်သက်၍ သိကောင်းစရာများ ရှင်းလင်းပြောကြားခဲ့ပြီး ပြည်နယ်ကျန်းမာရေး၊ ပြည်နယ်ကြက်ခြေနီ၊ ပြည်နယ်မီးသတ်အဖွဲ့နှင့် ဌာနဆိုင်ရာများမှ တာဝန်ရှိသူများနှင့် ဆရာ ဆရာမ ကျောင်းသား ကျောင်းသူများ ပါဝင်တက်ရောက်ခဲ့ကြကြောင်း သိရှိရပါသည်။