၂၀၁၅ခုနှစ်၊ အောက်တိုဘာလ(၁၀) ရက်နေ့နှင့် (၁၁) ရက်နေ့တို့တွင် မိုးသည်းထန်စွာရွာသွန်းမှုကြောင့် ကယားပြည်နယ်၊ ဖားဆောင်းမြို့နယ်၊ မော်ချီးကျေးရွာအုပ်စုရှိတောင်ပေါ်ရွာ၊ (၁၆) ကုန်းရွာ၊ (၁၃) ကုန်းရွာ၊ လိုခါးလိုရွာနှင့် ဇီးပင်ကွေ့ကျေးရွာတို့၌ မြေပြိုမှုဖြစ်ပွားခဲ့ရာ နေအိမ် (၆၀) လုံးနှင့် ဘုရားကျောင်း (၁) ကျောင်း ပြိုကျပျက်စီးခဲ့၍ လူဦးရေစုစုပေါင်း (၃၆၉) ဦး ဘေးဒုက္ခကြုံတွေ့ခဲ့ကြောင်းနှင့် လူ (၁၆) ဦး သေဆုံးပြီး (၆) ဦး ပျောက်ဆုံးခဲ့ကြောင်း ကနဦးသတင်းရရှိခဲ့ပါသည်။ အဆိုပါဘေးသင့်ပြည်သူများအတွက် လူမှု၀န်ထမ်း၊ ကယ်ဆယ်ရေးနှင့် ပြန်လည်နေရာချထားရေး၀န်ကြီးဌာနမှ ဆန်ရိက္ခာဖိုးငွေ (၆၁၉၅၀၀)၊ သေဆုံး/ပျောက်ဆုံး ထောက်ပံ့ငွေ (၂၂၀၀၀၀၀) နှင့် တန်ဖိုးငွေ (၂၂၀၆၆၀၀) ရှိ ကယ်ဆယ်ရေးပစ္စည်းများ၊ စုစုပေါင်းငွေသားနှင့် ပစ္စည်းထောက်ပံ့မှု (၅၀၂၆၁၀၀) (ကျပ်သိန်းငါးဆယ်နှစ်သောင်းခြောက်ထောင့်တစ်ရာတိတိ) ကို ပြည်နယ်အစိုးရအဖွဲ့မှတဆင့် ထောက်ပံ့ခဲ့ပြီး ဖြစ်ပါသည်။
ဆက်လက်၍ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှ (၁၄-၁၀-၂၀၁၅) ရက်နေ့တွင် အဆိုပါဘေးသင့်ပြည်သူများအတွက် ဘေထုပ် (၂၂၀) ကီလို (၂) ထုပ်၊ ဆန် (၅၀၀) အိတ်၊ ဆန် (၅ ပြည်ဝင်) (၂၀၀) အိတ်၊ စားသောက်ကုန် (၈) ထုပ်၊ ခေါက်ဆွဲခြောက် (၁၀၀) ကာတွန်း၊ Family Kits (၃၂၀) ထုပ် တို့ကို ဆက်လက်ထောက်ပံ့ရန်အတွက် ကယားပြည်နယ်သို့ ပေးပို့ဆောင်ရွက်လျက်ရှိပါကြောင်းနှင့် လိုအပ်သည်များ ဆက်လက်ပေးပို့နိုင်ရေးဆောင်ရွက်လျက်ရှိပါကြောင်း ဖော်ပြအပ်ပါသည်။