လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ကယ်ဆယ်ရေးနှင့် ပြန်လည်နေရာချထားရေးဦးစီးဌာနမှ ညွှန်ကြားရေးမှူးချုပ် ဒေါက်တာကိုကိုနိုင်ဦးဆောင်၍ ရခိုင်ပြည်နယ်ကယ်ဆယ်ရေးနှင့်ပြန်လည်နေရာချထားရေးဦးစီးမှူးရုံးမှ တာဝန်ရှိသူများ၊ ရသေ့တောင်မြို့နယ် အထွေထွေအုပ်ချုပ်ရေးမှူးနှင့်တာဝန်ရှိသူများသည် (၁၀- ၉- ၂၀၁၇ )ရက်နေ့တွင် ARSA အစွန်းရောက်အကြမ်းဖက်မှုများကြောင့် ရသေ့တောင်မြို့နယ် ယာယီခိုလှုံရာနေရာများသို့ ရောက်ရှိနေသော ရသေ့တောင်မြို့နယ်အတွင်းရှိ ရခိုင်နှင့် ဒိုင်းနက်လူမျိုးများ အများစုနေထိုင်ရာကျေးရွာများမှ ဒေသခံတိုင်းရင်းသားများအတွက် ဆန်နှင့်စားနပ်ရိက္ခာအတွက် ထောက်ပံ့ငွေ (၁,၇၂၅,၄၃၄/- )ကျပ်အားလည်းကောင်း၊ အလှူရှင်များမှ လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနသို့ လှူဒါန်းထားသော အလှူငွေများဖြင့် ဒေသခံတိုင်းရင်းသားများ၏ သားသမီး ကျောင်းသား/သူ (၁၈၁) ဦး အတွက် ပညာသင်ထောက်ပံ့ငွေ (၂,၃၃၅,၀၀၀/-)ကျပ်နှင့် ထပ်မံရောက်ရှိလာသော ကျောင်းသား/သူ(၂၂) ဦးအတွက် (၂၆၀,၀၀၀/-) စုစုပေါင်း ကျောင်းသား/သူ(၂၀၃)ဦးအတွက် ပညာသင်စရိတ်စုစုပေါင်း ထောက်ပံ့ငွေ (၂,၅၉၅,၀၀၀/- )အား လည်းကောင်း အသီးသီးပေးအပ်ထောက်ပံ့ခဲ့ကြောင်း၊ ညွှန်ကြားရေးမှူးချုပ်နှင့် အဖွဲ့သည် ယာယီခိုလှုံရာနေရာများသို့ သွားရောက်ကာ ဒေသခံတိုင်းရင်းသားပြည်သူများအား ရင်းရင်းနှီးနှီး တွေ့ဆုံနှုတ်ဆက်ကာ အသက် (၉၀)နှစ် အထက် အဘွား (၃)ဦးအား (၁)ဦးလျှင် (၃၀,၀၀၀/-)ကျပ်နှုန်းဖြင့် ထောက်ပံ့ငွေ (၉၀,၀၀၀/-)ကျပ်အား ထောက်ပံ့ပေးအပ်ခဲ့ပြီး အားပေးစကားပြောကြားခဲ့ကြောင်း သတင်းရရှိပါသည်။