၃-၅-၂၀၁၇၊ နေပြည်တော်
လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာဝင်းမြတ်အေးသည် ယနေ့နံနက်ပိုင်းတွင် အဆိုပါဝန်ကြီးရုံးမေခလာခန်းမ၌ မြန်မာနိုင်ငံဆိုင်ရာ အမေရိကန်သံအမတ်ကြီးH.E. Mr. Scot Marciel နှင့်အဖွဲ့အား လက်ခံတွေ့ဆုံခဲ့ပါသည်။ထိုသို့တွေ့ဆုံရာတွင် မြန်မာနိုင်ငံ၏ အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမှုကော်မတီနှင့် လုပ်ငန်းကော်မတီများဖွဲ့စည်းထားရှိမှုနှင့် လုပ်ငန်းစဉ်များ၊ သဘာဝဘေးအန္တရာယ်ဆိုင်ရာစီမံခန့်ခွဲမှု လုပ်ငန်းများတွင် အရပ်ဘက် စစ်ဘက် ပူးပေါင်းဆောင်ရွက်မှုအခြေအနေများ၊ သဘာဝဘေး အန္တရာယ်နှင့် စပ်လျဉ်း၍ အစဉ်အမြဲအဆင်သင့်ဖြစ်စေရေးဆောင်ရွက်နေမှုများ၊ ရခိုင်ပြည်နယ်တွင် ဒေသဖွံ့ဖြိုးတိုးတက်ရေး၊ အလုပ်အကိုင်အခွင့်အလမ်းရရှိရေးအတွက် ဆောင်ရွက်မှုများ၊ ပြည်တွင်းနေရပ်စွန့်ခွာနေထိုင်သူများအတွက် အသက်မွေးဝမ်းကြောင်းသင်တန်းများ ဆောင်ရွက်ပေးနေမှုများ၊ ဝန်ကြီးဌာနအနေနှင့် ဆောင်ရွက်လျက်ရှိသည့် လူမှုကာကွယ်စောင့်ရှောက်ရေး အစီအစဉ်များရေးဆွဲပြီး၊ ရေးဆွဲလျက်ရှိသည့် လူမှုဝန်ထမ်းဆိုင်ရာဥပဒေနှင့် နည်းဥပဒေများ၊ နှစ်နိုင်ငံပူးပေါင်းဆောင်ရွက်နိုင်မည့် ကိစ္စရပ်များကို ရင်းနှီးပွင့်လင်းစွာဆွေးနွေးခဲ့ပါကြောင်း သတင်းရရှိပါသည်။